ممكن تنتظر معايا شوية

زائر

ليه همتي ما بتبقاش في علو على طول؟؟

ليه شوية تبقى عالية وأحيانا كتير بتبقى في عجز وكسل؟؟؟؟

ليه كل ما أمشي خطوة أو خطوتين أتعثر وأقع؟؟؟

ايه المشكلة ؟؟ وفين المشكلة؟؟؟؟

المشكلة إنك للأسف مش عارف تحدد هدفك صح؟؟؟

فاهم الدنيا غلط؟؟؟

مش عارف انت عايز ايه بالضبط؟؟؟

ممكن ترد عليا ويقول لا أنا عارف أنا عايز ايه ومحدد هدفي....طيب يا ترى هل تسعى جاهدا لتحقيقه؟؟؟

هل فعلا خطوت خطوات ايجابية أثبتت إنك عايز بجد؟؟؟؟

طيب ليه الأعمال الفعلية بتبقى لحظات وبترجع تاني لحالة الفتور وتمكث فيها وقت طويييييييييييييييييل؟؟؟؟

خدها قاعدة من أول الطريق: " إنما يتعثر من لم يُخلص "

لو إنت ماشي في الطريق الى الله وبتتقدم فده دليل ان شاء الله على الصدق والإخلاص،،،

يوووووه تاني هتقولى الصدق والإخلاص أنا بقه هقعد في الدوامة ديه كتير....كل حاجة في الصدق والإخلاص ومش عارفين نحقق لا صدق ولا اخلاص يبقى العمل ايه ؟؟؟؟

لازم تعرف حاجة

" البداية لازم تكون من جواك إنت ، لازم يكون فيه رباط بينك وبين الله عز وجل ، طيب يا ترى هل فيه فعلا رباط بينك وبينه؟؟؟ طيب شكله ايه الرباط ده وثيق ولا...؟؟؟ فيه اتصال بينك وبين الله عز وجل؟؟؟؟بتفكر في ربنا كتير؟؟؟...جاوب بصدق بينك وبين نفسك...

ايه أهدافك في الحياة؟؟؟؟

يا ترى الجنة من ضمن أهدافك؟؟؟؟

طيب عملت ايه علشان توصل للهدف ده؟؟؟

بتفكر فيها؟؟؟

طيب بالله عليك أخر مرة جت فيها الجنة على بالك كان امتى؟؟؟

إنت تعرفها أصلا؟؟؟

تعرف اللى فيها علشان تحلم به؟؟!

يبقى لازم يكون هدفك هو الجنة

تعالى معايا نشوف مع بعض ما أخبرنا به النبي صلى الله عليه وسلم إن الجميع هيتعرض للفتن ومش بس كده لا كمان الفتن ديه هتعرض على قلب كل واحد فينا...طيب يا ترى قلبك عامل ازاي؟؟؟؟ هيتشرب الفتن لما تعرض على قلبه ولا هيقاومها؟؟؟؟

قال رسول الله صلى الله عليه وسلم: " تحترقون تحترقون ثم تأتي صلاة الظهر فتغتسلون ، تحترقون تحترقون ثم تأتي صلاة الظهر فتغتسلون (حسن صحيح ) ...."

المعنى المقصود من الحديث ده ايه؟؟؟؟

أن النبي صلى الله عليه وسلم يخبرنا أن فترة الفتور لا تزيد عن ما بين صلاتين ، فلو طوِّل معاك الموضوع بمعنى إنها بتستمر حالة الفتور ليومين...شهرين...سنتين يبقى هنا المشكلة

كده عرفنا المشكلة؟؟؟

عايزين نعرف ازاي نقدر نحقق علو الهمة ونحافظ عليها ونتخلص من حالة الفتور؟؟؟

بس الأول قبل أي حاجة لازم نتخلص من داء خبيث هو سبب أساسي في ضياع الهمة ألا وهو : " تعلق القلب بغير الله "

لازم يكون فيه اتصال وثيق بينك وبين الله عز وجل ... لازم يكون هو كل حياتك...أنا عايش لك يارب و بك يارب....

يبق أول حاجة لازم تحدد هدفك....هدفك الجنة ؟؟؟

طيب محتاج تفكر انت محتاج ايه علشان تحقق الهدف ده؟؟؟ وازاي تقدر تحققه؟؟؟

لازم تعرف مدى امكانياتك وقدراتك....لازم تثق انك تقدر توصل للهدف ده بحول الله وقوته...ممكن تقولى ده أنا كلي ذنوب ومعاصي....الكلام ده كبير عليا وانا على ادي...معقولة أنا اصلا أستاهل الجنة...

أرد عليك وأقول :

لازم تعرف من جواك إنك خير خلق الله على الارض بانتمائك لدين الله....عارف لو المعنى ده اتزرع جواك همتك هتبقى في القمة ان شاء الله...برضه مش فاهم...المعنى مش واصل لسة؟؟؟

هقول لك حالة الفتور اللى جوانا ديه محتاجة حاجة تشعلها من جوه قلبنا....الحاجة ديه ممكن تختلف من شخص لأخر...ممكن يكون حادث بسيط...موت أحد الأشخاص فجأة....النظر الى حال المسلمين المضطهدين في الأرض....

عارف لازم تحس بالخطر من جواك

...خطر ايه؟؟؟

لو انت فضلت عايش زي ما انت بنفس الخط المتعرج ده شوية عالى الهمة وشويتين في حالة فتور...عارف ده مدى خطورته ايه؟؟؟

يقولون: " إن خط حياتك بالضبط هو هو يكون على الصراط "

ده مش خطر؟؟؟؟!!! لا طبعا خطر قوووووى

النبي صلى الله عليه وسلم يخبر عن السائرين على الصراط إن الصراط ده زي الشعرة وأحَدُّ من السيف وعليه كلاليب بتخطف الناس فيقول ان فيه ناس بتعدي فناج مخدوش يعني ايه الكلام ده؟؟؟؟

المخدوش ده بيمشي خطوة ويقع ويقعد يمسك في الشعرة ديه ومش قادر يسيب ايده على إن أثر السيف ده جارح ايده(خادشها يعني) وبيتألم ويتوجع منه لكن مش قادر يسيب ايده لأن وهو متعلق تحته جهنم تتخطف الناس ويفضل متعلق كده إلى أن يأذن الله ويقف من تاني....
مش هو ده خط حياتنا....نمشي خطوة ونقع...نمشي خطوتين تلاتة ونقع تاني....طيب لو بقى الحال كده على الصراط....ممكن نقضي عمرنا كله اللى عشناه في الدنيا على الصراط عقبال ما نعرف نعدي الصراط بس

فاستدعائنا للمثال قدام عيننا يفوقنا...يبقى لازم نعرف ان حياة التعرج ديه ما تنفعناش وإنها لازم تتغير

فالحل:

التوبة على مافات والإستغفار والإنابة والرجوع إلى الله عز وجل علشان لما نتعثر ولو عثرة بسيطة نقدر نقوم من بعدها تاني ان شاء الله

تعالى بقه نعرف ايه أسباب الفتور وانخفاض الهمم:

1- الهم والحزن:

ياترى إنت مهموم بايه؟؟؟بتفكر في ايه؟؟؟

فكر فيما تفكر

عارف انت لو فكرت في همومك هتلاقيها تافهة ومالهاش لازمة...

تااافهة ايه الكلام ده؟؟؟

بتفكر فيه ايه...في وظيفة...في شقة ...في عربية...في زوجة... في المستقبل...على طول خايف وقلقان من المستقبل؟؟؟

ماشي لازم تفكر في المستقبل بشكل طموح كمان بس تعرف انت أحيانا كتير بتزودها قوووى وبتكبر الموضوع بزيادة...بتفكر في حاجات الله أعلم ان كنت هتعيش لها ولا لا؟؟؟

2- العجز والكسل

تعرف الفرق بين الكلمتين؟؟؟

العجز...يعني عايز الجنة بس مش قادر أو عايز يعمل خير بس مش عارف

إنما الكسل هو أصلا مش عايز فبالتالي مش قادر

دائما تقول أنا مش قادر ومش هقدر....لا الموضوع كبير عليا...لا الناس ديه أحسن مني...أنا لا أصلح للسكة ديه....

3- تضييع الوقت واهداره بغير فائدة

4- صحبة السوء والانخراط في بيئة مثبطة

5- تعلق القلب بغير الله

(بالدنيا ...بعشيق...بمنصب وووو...) وكراهية الموت

تعالى نشوف هنعالج هذه الأسباب ازاي؟؟؟

أول حاجة لازم تغير طريقة تفكيرك

همومك كلها لازم تبقى هم واحد..

قال صلى الله عليه وسلم: ( من كانت همّه الآخرة، جمع الله له شملَه، وجعل غناه في قلبه، وأتته الدنيا راغمة، ومن كانت همّهالدنيا، فرَّق الله عليه أمره، وجعل فقره بين عينيه، ولم يأته من الدنيا إلا ما كتب الله له (صحيح ) )

لو أيقنت إن الامر بيد الله عز وجل لزالت همومك

أحبب ما احب الله واكره ما يكرهه الله وإلا سيتنزل عليك غضبه وسخطه

إن الله لا يطلع على صورتك وإنماا يطلع على قلبك...طيب ايه اللى دخل ده في موضوعنا؟؟!!

أصل النبى صلى الله عليه وسلم أخبرنا ان الله عز وجل يحب معالي الأمور ويكره سفاسفها...

فلو اطلع ربنا على قلبك ولاقاه مشغول بكلام فاضي ودنيا وتوافه الأمور ممكن ساعتها يكرهك...ساعتها هيكون هيكون حالك ايه؟؟؟؟

لكن لو اطلع على قلبك ولاقاه مشغول بحبه وطاعته وبهم الدين وبرضاه ان شاء الله هيحبك

انظر إلى ما يقوله سيدنا مالك بن دينار:

" إذا حشر الله الخلائق فقال يا مالك ، قلت: ربي لبيك، فيأذن لي أن أسجد بين يديه فلا أرفعها حتى أعلم أنه قد رضي ثم لا أبالي إن قال :إذهب يا مالك كن ترابًا كن ترابًا"

معني جميل جدااااااا.... كل همه ازاي يرضي ربنا وليس شيئا آخر

فيا أخي لما الحزن على الدنيا والعمر فيها محدود ولا سبيل لزيادته، والرزق فيها مقسوم ومقدَّر ولا سبيل لنقصانه ، والسعي للآخرة فيها مطلوب لاعذر لفواته...فكر ماذا ستقول لله يوم القيامة؟؟؟

ثاني حاجة العجز والكسل أعالجهم ازاي؟؟؟

كلمة ما أقدرش امحها من قاموسك تماماااااا

واعلم أن الأمر بيد الله عز وجل وإنك لا تملك لنفسك لا ضر ولا نفع ولا أي شئ

اعلم انك وحدك لا تستطيع فعل اي شئ...وحدك ضعيف امام كل شئ....وحدك لا تقوى على مواجهة اي شئ...فلماذ لاتلجأ إلى رحاب ربك الذي بيده ملكوت كل شئ؟؟؟

لما تعرف ربنا بجد هتبقى كلمة ما أقدرش مش موجودة في ذاكرتك ابداااا

أكثر من هذا الدعاء وردده دائما وأبدا "لا حول ولا قوة إلا بالله"

وردد هذا أيضا:" اللهم إني أعوذ بك من الهم والغم"

تعالى معايا شوف مثال على علو الهمة من زمننا هذا والأمثلة كتير

أخ لسة ملتزم بقاله ست شهور بس قرأ أن سيدنا عثمان(رضي الله عنه) قرأ في ركعة الوتر القرءان كاملا...قال أنا ليه ما أعملش زي سيدنا عثمان ؟! وفعلا صلى من العشاء لغاية الفجر بالقرءان كاملا في ركعة الوتر....صدق النية مع الله فوفقه الله للخير

ليه ما يبقاش جواك همة زي ديه؟؟؟ ليه ما تلحش على نفسك بالمعاني الجميلة ديه....ليه ما يبقاش جواك إن أنا لم أُخلَق إلا لطريق الخير؟؟؟

ثالث خطوة في خطوات العلاج:

الرضا بما قسمه الله لك...

احساسك بهذا الأمر هيريحك وهيبعد عنك كل وسوسة توقفك عن طريق الخير والقرب من الله

رابعا: لا تيأس ان تعثرت...فلا ييأس من روح الله إلا القوم الكافرون

انت خلاص عايز تلتزم وبدات الخطوات الأولى من الطريق وبعثت لك فتنة ردتك عن طريق الالتزام هل ننيأس ونعود كما كنا في غفلة؟؟؟؟ لا والف لا

واحد كان نفسه يكلم بنت بقاله سنين وأول ما التزم البنت هي اللى جت تكلمه وتفكره بالماضي فهو ضعف ورجع...بس هو كان عايز يلتزم لكن مع اول فتنة سقط

لازم تعرف ان الفتنة بعثت لك علشان تختبر مع صدقك مع الله

، يقول الله عز وجل:

{أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ }العنكبوت2

لا تيأس اخي الكريم وإعلم أن رحمة ربك سبقت غضبه وأخلص هذه المرة واصدق الله يصدقك

خامسا: لا تجلس في بيئة مثبطة للهمم وصاحب أصحاب الهمم العالية

احذر أخي صحبة السوء واعلم انها من اهم عوامل ضعف الهمة وتثبيطها

فتش فى أصحابك وأحذر ان يكون من بينهم واحد تندم على صحبته يوم القيامه ..

الصديق السوء الذى يضلك عن الاسلام ويضلك عن طريق الهدايه. ويضلك عن طريق الجنه.

ياعم طيب انا هلاقى فين دلؤتى الصاحب ده ولا حتى ايه صفاته ده !!!

** صاحب من يحيا الحياء بصحبته وهو الصاحب الذى اذا رأيته او تكلمت معه تستشعر قيمه

الحياء من الله -عز وجل- فوجوههم تذكرك بالله -سبحانه وتعالى- ناهيك عن أقولهم وأفعالهم

فكلماتهم رقيقه تذكر بالله وتملئ القلوب بالحياء و الايمان و الخشيه من

الرحيم الرحمن ولما لا فكلماتهم هى ((( قال الله , قال رسول الله )))

قال صلى الله عليه وسلم: ( إن من الناس ناساً مفاتيح للخير مغاليق للشر ( حسن ))

سادسا عليك بالدعاااااااء

لأنه سنة الأنبياء، وجالب كل خير، وقد قال صلى الله عليه وسلم: ( أعجز الناس من عجز عن الدعاء ( صحيح ) )

سابعا: استكثر من أعمال الخير ولا تحقرن من المعروف شيئا

لأن المعروف الصغير ده ممكن يكون هو سبب دخولك الجنة ان شاء الله

ثامنا: استشعر اهمية كل لحظة في حياتك

لازم تكون كل دقيقة في حياتك لها اهمية ، لما تحط في ذهنك قيمة اللحظة هتعلو همتك، لو قلبك متعلق بالجنة هيبقى للحظة قيمة وثمن في حياتك.

وقد قيل:" من يتعبد يزدد قوة ، ومن يتكسَّل يزدد فترة"

تاسعا: ذكر الموت كثيرا

عارف لو تذكرت الموت هتخاف من ذنوبك وهتسرع في التوبة والانابة الى الله

عاشرا: إرادة الاخرة

قال تعالى:

{وَمَنْ أَرَادَ الآخِرَةَ وَسَعَى لَهَا سَعْيَهَا وَهُوَ مُؤْمِنٌ فَأُولَئِكَ كَانَ سَعْيُهُم مَّشْكُوراً }الإسراء19

وأخيرا: شجع نفسك

بمعنى يبقى عندك بعض العبارات الايجابية تحطها قدام عينيك على طول

لاتقل انا فاشل...أنا حزين..أنا طهقان...زعلان..لإن ديه بتورد لقلبك رسائل سلبية وتضعف من همتك

بل قل لم أوفق هذه المرة...أنا حققت نجاح جزئي وان شاء الله المرة القادمة سأحقق نسبة أكبر وهكذا..

موضوع: رد: ممكن تنتظر معايا شوية 22/01/10, 04:53 pm

كلامك صح يا مرام احنا للاسف مش عارفين نحدد هدفنا
أو يمكن بنسيب الشيطان يلعب بعقولنا علشان نرجع تانى لورا
لازم يكون عندنا هدف بنسعى علشانوا ومافيش أعظم من ان يكون هدفنا هو ارضاء ربنا والفوز بالجنة
بس سوري مرام يريت الكتبه تكبريه شويه علشان بقي الاعضاء يعرفوا يقرؤها ميرسي على الموضوع
ممكن تنتظر معايا شوية 2430934548

» فكر معايا وحاول تحل
» فكر وحاول تحل معايا
» لا تنتظر شكرا من احد
» ممكن ليش لا ,,,,
» تخيل كان ممكن تبقى قلة