بداية .. العنوان سليم ..
مستغرب ليه دى حقيقة .. فعلا كان ممكن تبقى قُلّة ..
زعلان قوى .. مستغرب .. ما تستغربش كان ممكن تبقى زير يا سيدى ..
مش هزار دى حقيقة فعلا .. كان ممكن تبقى قلة أو زير ..
ما أقصدش أنتقص منك ولا أقصد المعنى الدارج للكلمة وهو إنك مش فاهم حاجة لا .. أنا بتكلم بجد كان ممكن فعلا تبقى قلة !
طيب ايه الدليل ؟
الدليل قول الله تعالى }خَلَقَ الْإِنسَانَ مِن صَلْصَالٍ كَالْفَخَّارِ{ الرحمن14
إنتا والقلة والزير من صلصال كالفخار .. عمرك تخيلتها دى أو تفكرت فيها ؟
القلة اللى بتشرب بيها .. القلة اللى لما حد يحب يعير حد فى فهمه يوصفه بيها كان ممكن تبقى انت ؟؟
خبطة تقع تتكسر .. أكبر نفع ليك تتملى بشوية مية علشان الناس تشرب وبعدين تفضى وهكذا ..
ولما تعيش سنة ولا اتنين وتبقى مش نافعة تتكسر وتترمى بمنتهى اللامبالاة .. حقيقة مفزعة مش كده ..
شفت نعم ربنا عليك قد ايه ..
شوية طين بقوا قلة وشوية طين تانيين بقوا أنا وأنت
أنا وأنت اللى بنشوف ونتكلم .. وانا أرى .. وفى رأيى .. وفى اعتقادى .. ومن رؤيتى ومن منظورى .. ومن خلال علمى .. وبعد ما بحثت ودققت .. ومن خلاصة تجاربى .. ومن واقع حياتى .. وإلى آخر هذا من الكلام المحفوظ اللى بنستهل بيه كلامنا
سبحان الملك !
أنا عايزك تستشعر النعمة دى بقلبك ..
ايه الفرق بين قطعة فخار صماء لا حياة ولا موت ولا بعث ولا نشور
وبينى وبينك بكل مفردات حياتنا بالسمع بالبصر بالكلام بالتفكير بالتذوق .. بالجنة ؟؟؟؟؟
الفرق فضل الله وكرمه .. عطفه وجوده ..
وبعدين يا مخدوع .. ترجع تغتر
يَا أَيُّهَا الْإِنسَانُ مَا غَرَّكَ بِرَبِّكَ الْكَرِيمِ{6} الَّذِي خَلَقَكَ فَسَوَّاكَ فَعَدَلَكَ{7} فِي أَيِّ صُورَةٍ مَّا شَاء رَكَّبَكَ{8}
في أي صورة .. يعني باختصار وهكررها تانى .. كان ممكن تبقى قلة
موضوع: تخيل كان ممكن تبقى قلة 
28/06/09, 12:29 pm
