ليله زوجية حالمة

ليلة زوجية حالمة


تبدأ أحداث قصتنا مع قرار اتخذته الزوجة الشابة الجميلة بابعاد وإزاحة بعض الملل والروتين اليومى
الذى تسرب إلى حياتهما ثم بدأ يغزوها من أوسع الابواب ترافقه مشكلات الواقع ومسئوليات الأطفال وأعباء الحياة فمالبث أن قفز الشوق الحميمى من الشباك موليا خلفه صورة باهتة لحب قديم قد غطاها تراب الزمن وغبار المسئوليات
قررت الزوجة وعزمت وبدأت التنفيذ


دق جرس الباب فإذا بزوجته تفتح له وهى فى ابهى صورها
ترتدى له أرق الثياب وهندامها من اروع ما يكون
بدت كالعروس فى ليلة زفافها وفى ا زينتها
دخل والدهشة تعلو جبينه ونظرات متعجبة تدور وتلف فى أرجاء الشقة فإذا به يلمح اضواء الشموع الخافتة هى وحدها التى تضىء المكان
بدأت أنفاسه تتنسم رائحة عبير الزهور والورود التى تملأ الشقة وقد وضعت على مائدة الطعام الفاخرة التى جهزت كما لو كان هناك حفلة خاصة لشخصية هامة جدا
عليها كل مايحب ويشتهى ويفضل من طعام تحيطه الورود والشموع الرقيقة بألوانها الدافئة

هو / ايه ده ايه الدخان ده كله معقول كده شوفى ايه سببه؟
هى /ياحبيبى ماتقلقش دى الشموع وانا الى منوراها؟
هو/ هو النور مقطوع عندنا والا ايه انا شايف العمارة كلها منورة
هى / لاياروحى انا بس حبيت أعمل لك جو شاعرى
هو/ شاعرى ايه بس خضيتينى اطفى الشموع دى مش خايفة على الولاد؟
هى/ماتخافش ياحبيبى انا النهاردة وصلت الولاد عند ماما وحيناموا عندها الليلة دى
هو/ وليه كده بس انت مش عارفة انى باكون قلقان لو ناموا بره البيت؟
هى/ايوة بس دول عند ماما مش حد غريب ماتقلقش
هو/ طيب نورى النور انا مش شايف كويس ايه ده بس؟
هى / طيب حانور النور ويلا ادخل وغير هدومك عشان العشا
هو/ وايه ده كله انت عازمة حد والا ايه؟
هى/لاابدا اناعاملة لك كل الى بتحبه هو انا عندى أغلى منك
هو/ وايه الورد ده كله افتحى الشبابيك حنتخنق مش عارفة انه كده الورد غلط علينا والمكان مقفول؟
هى/ طيب معلش بس شوف الورد أد ايه رقيق فاكر النوع ده كنت دايما تجيبه لى واحنا مخطوبين
هو/فاكر فاكر بس اعملى معروف افتحى البلكونة الكبيرة
هى/ حاضر رايحة افتحها اهو
هو/استنى استنى هنا تفتحيها ازاى وانت لابسة بالشكل ده البسى روب الاول
هى/ طيب حالبس روب بس ماقلتليش ايه رايك فى قميص النوم ده جديد واللون ده انت بتحبه
هو/آآآآآآآآآه واضح انه جديد وواضح كمان انه غالى أكيد بقى اشتريتيه من فلوس الهدية بتاعة قريبتنا الى ناويين نزورها بكرة يعنى اديكى فلوس للهدية بتاعة الزيارة والواجب تشترى قميص نوم جديد؟
هى/ايوة فعلا بس ماتقلقش انا حاشترى حاتصرف من معايا واشترى الهدية برضه المهم عجبك القميص؟
هو/مادام حتتصرفى يبقى كويس
هى/طيب يلا على العشا بقى شوف اناعاملة لك كل الى بتحبه
اثنــــــــــــــاءتناول العشاء

هو/أنا مش عارف الاكل ده كله حيروح فين ده كتير جدا
هى/ كل بالهنا والشفا المهم الاكل يعجبك ياحبيبى
هو/انا بصراحة حاسس انى مش مرتاح حتى الهضم مش
هى/طيب لو زهقان تعال نروح نقعد فى الأنتريه هناك أريح لك
هو/ طيب يلا حتى نتفرج على التليفزيون شوية

اثنــــــــــــاء مشاهدة فيلم رومانسى

هى/هنا اريح وكمان حافتح لك الشباك وارفع لك الستاير عشان نسمة الهوا الة دى تدخل
دى اكيد لها مفعول السحر
هو /هو مافيش حاجه تانية فى التليفزيون نشوفها غير الفيلم القديم ده؟
هى/غريبة ده الفيلم ده انت بتحبه مش فاكر لمادخلناه السينما سوا ايام الخطوبة؟
هو/فاكر فاكر بس ممكن اشوف الماتش؟
هى/طيب حاضر الى يريحك وحاعمل لك عصير تشربه وانت بتتفرج
هو/ طيب ياريت


بعـــــــــــد تناول العصير

هى/ بالهنا والشفا دلوقت بقيت احسن؟
هو/أحسن الحمدلله
هى/أمال ساكت ليه ومش بتتكلم؟
هو/اصلى بصراحة عايز أنام تعبان وهلكان من الشغل جدا
هى/طيب يلا نقوم ننام عشان ترتاح
هو/طيب ياستى روحى انت وانا حاجى وراكِ بس اشوف الأهداف بتاعة الماتش وأحصلك
هى/طيب منتظراك هناك
هو /على طول جاى وراكِ

فى الغرفة وقد طال الانتظار بعد أن خلقت نفس الجو الرومانسى والشاعرى الهادىء

هى/ غريبة اتأخر جدا كل ده بيشوف الأهداف ؟
هى/أروح اشوفه وانادى عليه بنفسى

تتجه الزوجة إلى غرفة الجلوس تنادى عليه بكل دلع وحنو وتنتظر منه أن يجيب النداء
فإذا بها تجده قد لبى نداءا آخر
التليفزيون وحده صوته يملأ المكان ويغط هو فى نوم عميــــــــــق

أدركت الزوجة أن صوتها كان ضعيفا جدا اضعف من أن يسمع نداءها الزوج
فتتجه إلى الشموع الخافتة والتى بدأ نورها يخبو فتطفئها بزفرة قوية يملأها الغضب والسخط والياس
وتمد يدها لتضع الغطاء على زوجها النائم
وتتجه إلى النافذة لتسدل الستائر


تسدل الستائر على محاولة فاشلة للهروب من الروتين اليومى وأعباء الحياة المثقلة بالمسئوليات وإزالة الغبار عن حب قديم كسته الهموم والتبعات